50 
PHAEDRI FABVLARVM 
FABVLA IX. 
TAVRVS ET VITVLVS. 
Angusto in aditu taurus luctans cornibus 
Cum vix intrare posset ad praesepia, 
Monstrabat vitulus quo se pacto flecteret. 
Tace, inquit, ante hoc novi, quam tu natus es- 
Qui doctiorem emendat, sibi dici putet. 5 
FABVLA X. 
CANIS ET SVS ET VENATOR. 
Adversus omnes fortis veloces feras 
Canis cum domino semper fecisset satis, 
Languere coepit annis ingravantibus. 
Aliquando obiectus hispidi pugnae suis 
Adripuit aurem: sed cariosis dentibus 5 
Praedam dimisit. Hic tunc venator dolens 
Canem obiurgabat. Cui senex contra Lacon: 
Non te destituit animus, sed vires meae. 
Quod fuimus, lauda, si iam damnas, quod sumus. 
Hoc cur, Philete, scripserim, pulchre vides. 10 
APPENDIX. 
FABVLAE NOVAE. 
FABVLA I. 
SIMIVS ET VVLPES. 
Avarum etiam quod sibi superest non libenter dare. 
Vulpem rogabat partem caudae simius, 
Contegere honeste posset ut nudas nates; 
Cui sic maligna: Longior fiat licet, 
Tamen illam citius per lutum et spinas traham, 
Tibi quam partem quamvis parvam inpertiar.